ДОЛЖАТ НА КИНА: Малдивите се на чекор до банкрот

Малдивите се на работ на банкрот, а најмногу ѝ должат на Кина. 

Агенцијата за кредитен рејтинг Фич оваа недела предупреди дека островската држава е изложена на ризик од неисполнување на надворешниот долг.

Ризиците со кои се соочуваат Малдивите произлегуваат од намалувањето на нивните девизни резерви, објави „СЕЕ.биз.еу“.

Тие во мај се намалија на само 492 милиони американски долари, а само за годинава се очекуваат 409 милиони долари за сервисирање на долгот. Ова ќе ја стави земјата со околу 2.000 мали атоли во Индискиот Океан, позната по своите престижни одморалишта и познатите патници, под сериозен притисок, објави оваа недела француската новинска агенција АФП.

Официјалните податоци покажуваат дека надворешниот долг на државата лани изнесувал 4,04 милијарди долари. Тоа е 118 отсто од нивниот бруто домашен производ. За една година порасна за 250 милиони долари.

Заклучно со јуни минатата година, 25,2 отсто од надворешниот долг на Малдивите е во рацете на Експорт-импорт банка на Кина. Банката е најголемиот индивидуален доверител на островската држава.

Инаку, држава во светот која трипати банкротирала во 21 век е Аргентина и сега пак е во криза.