ДОЛАРОТ ОТФРЛЕН: Русија и Иран започнаа со меѓусебна трговија само со национални валути
Иран и Русија во трговските трансакции користат само национални валути, а повеќе не долари, во согласност со билатералните договори во финансискиот сектор, изјави гувернерот на Централната банка на Иран, Мохамад Реза Фарзин.
„Склучивме валутен договор со Русија и целосно го отстранивме доларот. Сега тргуваме само со рубли и риали“, рече гувернерот на конференцијата што ја пренесува ТВ каналот СНН, според извештајот на руската новинска агенција ТАСС.
Финансиските власти го договорија курсот што ќе го применуваат за надворешно-трговските трансакции, додаде Фарзин.
На 21 октомври Кремљ објави дека употребата на националните валути во иранско-руските трансакции е зголемена за 12,4 отсто од почетокот на годината и сега сочинува 96 отсто од сите трансакции.
Во јули руската и иранската централна банка потпишаа договор за размена на валути, при што е завршена интеграцијата на рускиот платен систем Мир и иранскиот Шетаб, потсетува агенцијата ТАСС.
Руската и иранската централна банка ја завршија првата фаза од интеграцијата, објави пред две недели на социјалната мрежа Х, шефот на Одделот за односи со јавноста на Централната банка на Иран, Мостафа Гамари Вафа, според извештајот на ТАСС, додавајќи дека Граѓаните на Исламската Република сега можат да користат картички на територијата на Русија на системот Шетаб за подигање готовина во рубли.
На крајот од втората фаза, руските туристи ќе можат да подигнуваат готовина од банкоматите во Иран, користејќи Мир картички, а на крајот на третата, иранските граѓани ќе можат да плаќаат за стоки и услуги со Шетаб картички во Русија. соопшти руската новинска агенција Интерфакс.
