Договорот со „Бехтел и Енка“ целосно доставен до ДЗР
Директорот на Државниот завод за ревизија, Максим Ацевски, во денешното интервју за „Фактор“ потврди дека Владата во целост го доставила договорот со „Бехтел и Енка“ за изградба на четирите автопатски делници од Коридорот 8 и Коридор 10д.
Владата претходно го разгледала барањето од ДЗР за доставување на Договорот со изведувачот Бехтел и Енка на една од последните седници. Ацевски даде објаснување зошто ДЗР реши да го побара овој Договор.
– Согласно Годишната програма за работа на ДЗР за 2023 година, Државниот завод за ревизија во рамки на ревизијата на успешност „Реализација на капитални инвестиции финансирани преку Буџетот на РСМ, ЕУ фондови и средства од други меѓународни финансиски институции во надлежност на централната власт и локалната самоуправа“ опфатени се и стратешки инвестиции во патна инфраструктура за периодот од 2021 – 2023 година. Од причина што во известувачкиот период за 2023 година има извршено исплати на финансиски средства по однос на овој Договор, истиот е предмет на ревизија. По барање на ДЗР од страна на Јавното претпријатие за државни патишта (ЈПДП), Договорот е доставен во целост, потврди Ацевски.
Претходно договорот со американско-турскиот конзорциум на разгледување го побараа Обвинителството за организиран криминал и корупција и Државната комисија за спречување корупција.
