ДОДЕКА Е ВО ХАОС, „Еуроникел“ влече струја преку МЕПСО
Гигантот за тoпење никелова руда Еуроникел Индустрис во моментов троши струја преку операторот на електропреносниот систем МЕПСО и прави дебаланси во мрежата, со неизвесност кој на крај ќе ја плати фактурата. Поранешен ФЕНИ во моментов ја држи печката вклучена, иако практично е без раководство и немање интерес од инвеститорот, а од друга страна е еден од најголемите потрошувачи на електрична енергија во земјата.
Операторот на пазарот на електрична енергија МЕМО информира дека ќе го суспендира Еуроникел од 1 декември како директен потрошувач на електрична енергија на големо, затоа што од 17 ноември е со раскинат договор за купопродажба на електрична енергија од приватниот снабдувач ЕДС.
Од МЕПСО потврдуваат дека Еуроникел во овој период е оставен да прави отстапувања со повлекување на електрична енергија од мрежата, нешто што на крај може да се покаже многу скапо во вакви вонреди околности, а неизвесно е кој на крај ќе ја плати фактурата за тоа, ако се знае дека сопственикот на најголемата компанија од вардарскиот регион повеќе нема интерес за нејзиното работење.
– Комбинатот Еуроникел од Кавадарци, како самостоен учесник на пазарот на електрична енергија на големо, откако му е раскинат билатералниот купопродажен договор, повлекува електрична енергија од системот на АД МЕПСО во количини од 5 MW на час, ни потврдија од МЕПСО.
Еуроникел е најголем директен потрошувач на електрична енергија на големо во Македонија. Според проекциите за 2022, Еуроникел требало да потроши 613 гигаватчасови електрична енергија за цела мината година. За споредба, на второ и трето место се „Бучим“ и „Цементарница УСЈЕ“ со 115, односно 110 гигаватчасови.
Иако состојбата во која се најде Еуроникел не влева оптимизам, директорот на МЕМО, Симон Шутиноски, вели дека ќе се даде рок за склучување билатерален купопродажен договор со приватен трговец, пред да биде суспендиран потрошувачот од пазарот на електрична енергија на големо.
– Бидејќи Еуроникел Индустри не е снабдуван учесник на пазарот на електрична енергија на мало, туку е учесник на пазарот на електрична енергија на големо, истиот не се снабдува со електрична енергија од МЕПСО туку е во дебаланс или ја користи балансната енергија на АД МЕПСО Скопје за која ќе треба да му плати на преносниот систем оператор АД МЕПСО за своето отстапување – направениот дебаланс за што има склучено Договор за балансна одговорност со АД МЕПСО и доставено финансиско обезбедување. После евентуалното негово суспендирање од пазарот на електрична енергија на големо тој станува учесник на пазарот на електрична енергија на мало за кого важат Правилата за снабдување со електрична енергија, вели Шутиноски.
Минатата година „ФЕНИ“ ја завршил со вкупни обврски од 87 милиони евра. Со оглед на тоа дека бизнис климата за работа не била подобра, и годинава постои веројатност дека „ФЕНИ“ ги зголемил своите обврски. Изминатиот период загриженост за тамошната состојба искажуваа единствено претставници од синдикатот, кој стравува дека друштвото ќе влезе во уште полоша ситуација доколку ја исклучи печката.
А.К.
