До 8.000 години стара населба откриена под водите на Охридското Езеро
Археолозите открија докази за најстарата човечка населба на европско езеро на албанската страна од Охридското Езеро, за која се верува дека е стара до осум илјади години.
Група научници од Швајцарија и Албанија секој ден поминуваат по три часа под вода, макотрпно отстранувајќи дрвени столбови на кои биле потпрени куќите, јави Ројтерс. Во населбата се пронајдени коски од домашни и диви животни, бакарни предмети и керамика со прецизни резби.
Алберт Хафнер од Универзитетот во Берн посочи дека иако слични населби се пронајдени во алпскиот и медитеранскиот регион, населбата во Лин, Албанија, е половина милениум постара, датирајќи од пред шест до осум илјади години.
„Органскиот материјал е извонредно зачуван поради потопената средина, што ни овозможува да ја изучуваме исхраната и земјоделските активности на тогашните жители“, изјави Хафнер.
Истражувањата покажуваат дека Охридското Езеро, лоцирано на границата меѓу Албанија и Македонија, е најстарото езеро во Европа со возраст поголема од еден милион години.
Староста на наодите е одредена со радиоизотопско датирање и дендрохронологија, која ги брои годишните прстени на дрвјата. На локацијата се собрале повеќе од илјада примероци дрво. Населбата, која можеби ја населувале неколку стотици луѓе, се протега на околу шест хектари, а досега, по шест години истражување, е ископан само околу еден процент од целокупниот материјал.
