ДКСК: 58% од институциите не доставиле податоци за службените возила
Државната комисија за спречување на корупцијата (ДКСК) објави дека голем дел од институциите не ја исполниле својата законска обврска да достават податоци за службените возила, согласно Изборниот законик.
Обврска да достават информации за бројот, видот, регистарските таблици и возната состојба на возилата имаа вкупно 1.514 институции. До 29 септември 2025 година, тоа го направиле 635 институции или 42%, додека 879 институции, односно 58%, воопшто не доставиле податоци.
Од институциите што испратиле информации, 403 тоа го сториле навремено, пријавувајќи 4.079 возила, додека 232 институции со задоцнување пријавиле 2.558 возила. Според податоците објавени во Регистарот на службени моторни возила, досега се внесени информации за 578 институции кои располагаат со вкупно 6.637 возила. Од нив, 5.456 се во возна состојба, 1.003 не се, а за 178 возила нема податоци за возната состојба.
ДКСК посочува дека постојат несогласувања меѓу податоците доставени од институциите и оние што се водат во евиденцијата на Министерството за внатрешни работи (МВР). Кај 34% од институциите бројките целосно се совпаѓаат, но кај 66% има отстапки – некои пријавиле повеќе, а некои помалку возила отколку што е заведено во МВР. Исто така, 27 институции пријавиле дека располагаат со возила кои воопшто не постојат во евиденцијата на МВР, што отвора сомнежи дека тие можеби се водат на други правни лица, но се користат од институциите.
Покрај тоа, дел од возилата имаат статус на класифицирани информации и не се јавно објавени.
Од 879 институции кои воопшто не доставиле податоци, ДКСК утврди дека 192 располагаат со 2.028 возила, според информациите од МВР.
„Со оваа пракса овозможуваме јавен увид и ја поттикнуваме транспарентноста и одговорноста кај институциите кои имаат обврска да пријават службени возила,“ наведуваат од ДКСК.
