Димовска: Здружението на жртви побара да им биде доставен доказниот материјал за Пулс, судот се соочува со предизвици
Во пресрет на почетокот на судењето за случајот „Пулс“, в.д. претседателката на Кривичниот суд, Даниела Димовска, денеска на брифинг ги соопшти организациските детали и предизвици со кои ќе се соочи судот.
Во случајот се опфатени вкупно 38 обвинети, од кои 35 се физички лица, а 3 се правни лица.
Димовска информираше дека Судечкиот совет веќе донел одлука да не дозволи снимање на главната расправа.
Еден од клучните предизвици во постапката, според Димовска, ќе биде менаџирањето на оштетените, кои во голем дел се и сведоци.
„Од адвокатите ќе бараме да им се предочи на оштетените, кои исто така се и сведоците, дека нема да може да ја следат расправата пред да сведочат, бидејќи во спротивно тоа би значело дека може да го изгубат правото за сведочење,“ истакна Димовска.
Таа додаде дека судот се соочува и со предизвик во врска со барањето на Здружението на жртвите, кое побарало да им биде доставен комплетниот доказен материјал.
Дополнително, в.д. претседателката појасни дека во моментов се водат два одвоени предмети поврзани со случајот, за кои сè уште нема одлука дали ќе бидат споени во една постапка.
Поради чувствителноста на предметот и очекуваното присуство на голем број странки, Димовска потврди дека за време на рочиштата ќе биде обезбедена и лекарска екипа во близина на судницата.
