Десет противпожарни возила го гаснат пожарот на депонијата „Дрисла“
Десет противпожарни возила интервенираат во гаснењето на пожарот што попладнево избувна на депонијата „Дрисла“. Командантот на Територијалната противпожарна бригада на Град Скопје, Звонко Томевски, изјави дека е побарана помош и од ЈП „Комунална хигиена“, од каде што се испратени две цистерни за дотур на вода. Тие се на локацијата и ги дополнуваат противпожарните возила.
„Се надевам дека во најскоро време пожарот ќе биде целосно изгаснат“, изјави Томевски.
Бил побаран и авион од Дирекцијата за заштита и спасување, но немало услови за негово ангажирање.
„Станува збор за посериозен пожар од поголеми размери. Постоеше опасност пламенот да ја зафати боровата шума во близина на депонијата и да предизвика дополнителен шумски пожар којшто можеше да загрози и објекти во околината“, додаде Томевски.
