Делови од Скопје без вода и со намален притисок: Апел за рационално користење на водата
Јавното претпријатие „Водовод и канализација – Скопје“ ја извести јавноста дека и денес, 21 јули 2025 година, продолжува енормно зголемената и неконтролирана потрошувачка на вода, што повторно доведува до нарушување на стабилноста на водоснабдителниот систем во градот.
Поради преоптовареноста, системот функционира со намален притисок и повремени прекини на водоснабдувањето во одредени делови на Скопје.
Од претпријатието потсетуваат дека градот се снабдува со вода од природни извори кои располагаат со ограничени количини питка вода, и апелираат до сите граѓани за рационално и совесно користење на водата. Посебно се повикува на воздржаност од користење вода за полевање градини и ниви, миење автомобили, полнење базени и слични намени што не се од витално значење.
Истовремено, апел се упатува и до органите на локалната самоуправа и месните заедници да преземат активности за подигање на јавната свест кај граѓаните и да придонесат кон намалување на непотребната потрошувачка.
„Водовод и канализација – Скопје“ ги повикува граѓаните кои ќе забележат див приклучок да го пријават на телефонскиот број 02 3073 010, преку електронска пошта на [email protected] или на веб-страницата www.vodovod-skopje.com.mk.
Од претпријатието посочуваат дека дивите приклучоци предизвикуваат директна штета на водоснабдителниот систем и влијаат негативно врз квалитетот на услугата за сите корисници.
