Дебата во Комисијата за европски прашања за измените на Законот за работни односи, дел од пакетот закони за коридорите
Собраниската Комисија за европски прашања денеска расправа за предложените измени на законите поврзани со изградбата на коридорите, означени со европско знаменце, која стартуваше со претрес по амандманите од опозициската ВМРО-ДПМНЕ за измените на Законот за работни односи.
Со првиот од вкупно трите амандмани опозицијата побара бришење на членот 1 од законот, бидејќи според нив е неуставен.
-Ова што се случува не е усогласено со ниту една регулатива, со ниту една директива, рече пратеникот Миле Лефков од ВМРО-ДПМНЕ.
Според него, со вакви предлог законски решенија се штитат само нечии бизнис интереси. – Штитете го бизнис интересот, но, немојте тоа да го правите на грбот на работникот, рече тој.
Даниела Колева од СДСМ, пак, посочи дека со писмена согласност, работниците ќе може да работат прекувремено.
– Ги носиме овие закони поради тоа што имаме деструктивна опозиција која досега не поддржала ниту еден проект, рече таа.
Бојан Стојановски од ВМРО ДПМНЕ, пак, истакна дека сите синдикати, без исклучок, се против носењето на овој закон.
– Ова што се случува е деградирање и приватизација на цела една држава, рече тој.
Неговата сопартијка Гордана Силјановска Давкова, критикувајќи го ставањето европско знаменце на законите реле дека „ова не е знаме на ЕУ, ова е гусарско или пиратско знаме бидејќи значи упад во правото“.
Таа посочи дека измените се неуставни и истите ќе ги повредат основните социо-економски човекови права.
– Овие права се директно врзани и за социјалниот статус. Значи токму заради остварувањето на социо-економски права, граѓаните имаат право да формираат синдикати, нив тука не ги гледам, рече таа.
За збор се пријавија сите пратеници од опозицијата кои зборуваа за, според нив, неуставноста на овие закони.
Пратениците од СДСМ, пак, побараа разбирање и прифаќање на измените, бидејќи, според нив, тие се од огромно значење за државата.
Со измените што ги предлага Владата се дефинира дека заради континуитет во работата на овој проект прекувремена работа може да трае подолго од осум часа неделно и 190 часа годишно.
Како што образложи претходно министерот за труд и социјална политика Енвер Хусејин, прекувремената работа не значи 60 часа неделно, таа ќе зависи од временските услови на терен и од активностите на процесите на трасите, а секој прекувремен час ќе биде исплатен 35 проценти согласно Законот и Колективниот договор и со изјава за согласност од работникот.
Работата над 40 часа неделно ќе се смета и плаќа како прекувремена работа со задолжително почитување на одредбите за дневен и неделен одмор. Тоа значи дека работникот ќе има право на одмор од најмалку 12 часа во непрекинато меѓу два последователни денови во текот на 24 часа. Исто така, работникот има право на неделен одмор во траење од најмалку 24 часа непрекинато плус 12 часа дневен одмор. Дополнително, поради природата на работите и задачите што се вршат во работоте од национален интерес се јави потреба да можат да се спроведува и во недела. Предложениот закон предвидува измена со која се овозможува уредување на местото и начинот на исплата на плата на работници на проекти од национален и стратешки интерес, рече Хусејин.
На дневен ред на Комисијата за европски прашања се и предлог законите за изменување и дополнување на Законот за урбанистичко планирање, на Законот за градење, на Законот за експропријација, на Законот за утврдување на јавен интерес и номинирање на стратешки партнер за имплементација на проектот за изградба на инфраструктурниот Коридор 8 (делница: Тетово – Гостивар – Букојчани и проектот за автопатот Требеништа – Струга – Ќафасан) и Коридорот 10 д (делница на автопатот Прилеп– Битола) како и Предлог на закон за академија за судии и јавни обвинители, сите по скратена постапка.
Дебатата во Комисијата за европски прашања ќе продолжи во 16 часот.
