Давкова – Бегај: Нема поголема инвестиција во стабилноста на Западниот Балкан од членството во ЕУ
Во рамки на официјалната посета на албанскиот претседател во земјава, денеска во Скопје се одржа заедничка прес-конференција на претседателката Гордана Сиљановска-Давкова и нејзиниот албански колега Бајрам Бегај, на која беа потврдени одличните билатерални односи и заедничката определба за европска иднина.
Сиљановска-Давкова истакна дека посетата претставува уште една потврда за традиционално пријателските односи меѓу двете земји, нагласувајќи дека тие се темелат врз меѓусебна почит, доверба и партнерство. Таа посочи дека политичкиот дијалог се одвива во дух на отвореност и разбирање и дека меѓу двете држави нема отворени прашања, што, според неа, создава силна основа за продлабочување на соработката во сите области.
Иако функциите на претседателите се претежно церемонијални, Сиљановска-Давкова потенцираше дека како претставници на граѓаните имаат одговорност да го следат прогресот на државите, вклучително и економската соработка. Таа оцени дека постои простор за зголемување на трговската размена и инвестициите, како и за подобрување на инфраструктурната поврзаност и олеснување на прекуграничните процедури. Како позитивен пример ја наведе соработката меѓу царинските управи на двете земји, кои нашле решение за непречен транспорт поради блокадата на граничниот премин Ќафасан, со пренасочување преку Блато.
Европската интеграција беше една од клучните теми на разговорите. Претседателката нагласи дека двете земји се цврсто определени за членство во Европската Унија и дека реформите, владеењето на правото и борбата против корупцијата се суштински за напредокот. Таа предупреди дека билатерализацијата на евроинтегративниот процес и отворањето идентитетски и историски прашања може да го усложнат пристапувањето на земјите од Западен Балкан, оценувајќи дека членството во ЕУ е најголемата инвестиција во стабилноста на регионот.
Во контекст на безбедносните предизвици, беше истакната и одличната соработка во рамки на НАТО. Сиљановска-Давкова подвлече дека партнерството во Алијансата е од особена важност во време на глобална неизвесност и дека двете држави ќе продолжат да придонесуваат кон зачувување на мирот и стабилноста.
Посебен акцент беше ставен и на соработката во образованието и науката, со оглед дека дел од делегацијата бил и ректор на албански универзитет. Според претседателката, поврзувањето на академските и културните институции ќе придонесе за подлабоко меѓусебно разбирање и зацврстување на пријателството меѓу двата народа.
На крајот, Сиљановска-Давкова му се заблагодари на Бегај за посетата, оценувајќи дека средбата претставува поттик за уште поинтензивна билатерална соработка и дополнително продлабочување на заемната поддршка меѓу двете држави.
