Црвен крст: 149 милиони денари веќе префрлени кај семејствата на настраданите од пожарот во „Пулс“
Од вкупно собраните 159 милиони денари по трагичниот пожар во дискотеката „Пулс“ во Кочани, дури 149 милиони денари веќе се трансферирани кај семејствата на настраданите и повредените. Преостанатите десет милиони ќе бидат префрлени во наредните денови кон лица кои не биле првично евалуирани.
Ова денеска го соопшти генералниот секретар на Црвениот крст на Северна Македонија, Саит Саити, при потпишувањето на Меморандум за соработка со Министерството за внатрешни работи.
„Деновиве непрекинато даваме психолошка прва помош за населението, особено за оние кои претрпеа последици од катастрофата. Наскоро ќе го промовираме и Регионалниот центар за психолошка поддршка, кој е дел од националниот центар. Со тоа ќе бидеме уште поблиску до луѓето и нивното опоравување“, изјави Саити.
Тој информираше дека процесот на донации е веќе затворен и се подготвува финална проверка и презентација на податоците. Посебно значајно, според него, е тоа што Црвениот крст има верификација од меѓународна ревизорска куќа.
„На крајот на август ќе организираме состанок на т.н. одбор за транспарентност, на кој ќе бидат поканети сите донатори. Ќе биде презентиран ревизорскиот извештај, точно ќе се прикаже колку средства се собрани и каде се распределени, со цел Црвениот крст да остане препознатлив по транспарентност и отчетност“, додаде Саити.
Црвениот крст и натаму ќе продолжи со психосоцијална поддршка и координација со институциите во справувањето со последиците од трагедијата.
