Чудо во Сплит: МЗТ го освои „Грипе“ и остана во игра за опстанок во АБА (ФОТО)

07/04/2023

Кошаркарите на МЗТ Скопје ја продолжуваат битката за опстанок во АБА-лигата, откако вечерва по голема борба, како гости, го совладаа Сплит (77-74) и се изедначија по бројот победи со директниот ривал за избегнување на последното место, Борац Чачак.

Аеродромци до првата гостинска победа дојдоа со храбра игра во сите 40 минути и без никаков респект кон противникот, кој сезонава игра фантастично во славната арена „Грипе“. Стартот со 8-0 го најави успехот на сино-белата чета, која само во неколку моменти кон крајот на првата четвртина им дозволи на сплиќани да дојдат до водство. Сето останато на оваа средба беше во знакот на „металците“, кои ја издржаа и канонадата тројки на Сплит во третата четвртина (пет). Тие на крајот умешно ја задржаа предноста, која во неколку наврати беше и двоцифрена и сосема заслужено се радуваа на големиот триумф.

Војдан Стојановски одигра мајсторски и средбата ја заврши со 16 поени и седум асистенции, додека зад него беше неговиот брат-близнак Дамјан со 13 поени. Двоцифрен поентерски ефект имаа уште Александар Бурсаќ со 12 поени и Мајк Кефи со 10 поени.

МЗТ сега има скор 6-19, додека Борац Чачак има 6-18, но и средба против фаворизираната Црвена Звезда в недела на домашен терен. На аеродромци за избегнување на испаѓањето им треба пораз на српскиот тим на овој меч и на следниот на гости кај Будуќност, како и победа во пресметката против Цибона за една недела во „Јане Сандански“.