Цените на нафтата повторно пораснаа – втора недела по ред
На светските берзи цените на нафтата пораснаа минатата недела, втора недела по ред, главно поради загриженоста дека ескалацијата на конфликтот на Блискиот Исток може да го наруши снабдувањето со нафта од таа област.
На лондонскиот пазар цената на барелот минатата недела порасна за 1,4 отсто, на 92,16 долари, додека на американскиот пазар цената на барелот порасна за 1,2 отсто, на 88,75 долари.
Цела недела цените варираат во зависност од вестите за ситуацијата на Блискиот Исток. Кога веста укажа на ескалација на конфликтот меѓу Израел и палестинската милитантна група Хамас, цената на нафтата порасна. И кога се чинеше дека тензиите се намалуваат, цените би биле под притисок.
Израел со денови најавува копнена инвазија на Газа, но засега ништо од тоа. „Цените на нафтата значително пораснаа поради индициите дека наскоро би можела да дојде до израелска копнена офанзива во Појасот Газа. Но, ситуацијата со понудата досега не е променета“, напишаа во петокот аналитичарите на Комерцбанк во преглед на состојбата на пазарот.
Од друга страна, на цената на нафтата негативно влијаеше најавата дека САД ќе ги ублажат санкциите кон Венецуела и ќе овозможат враќање на нејзината нафта на светските пазари. Вашингтон издаде шестмесечна дозвола за трансакции со венецуелскиот енергетски сектор откако владата во Каракас и опозицијата се договорија за избори во 2024 година.
Но, на Венецуела, велат аналитичарите, ќе и треба време да го зголеми производството, поради слабите инвестиции во овој сектор во последните години. По растот две недели по ред, цената на барелот на лондонскиот пазар поскапе за повеќе од 7 отсто во однос на почетокот на годината, а на американскиот пазар над 10,5 отсто.
