Бројот на жртвите од земјотресот во Јапонија достигна 180, 120 лица се водат како исчезнати
Бројот на жртвите од силниот земјотрес што на Нова година ја погоди префектурата Ишикава и околните области во централна Јапонија достигна 180, а 120 лица се уште се водат како исчезнати, соопштија денеска локалните власти.
Подоцна во текот на денот локалната полиција со околу 100 луѓе ќе започне опсежна операција за пребарување во урнатините на опожарениот пазар во Ваџима, каде што избувна голем пожар по земјотресот со јачина од 7,6 степени, пренесува Kyodo.
На пазарот во Ваџима, во пожарот што избувна на 1 јануари, уништени се околу 200 згради, соопшти локалната општинска администрација и пожарникарите.
Пазарот имаше многу дрвени згради и местото беше популарно кај туристите поради неговата историја долга повеќе од 1.000 години.
Повеќе од 28.000 луѓе сè уште се во центрите за евакуација во префектурата Ишикава, а наводно десетина се заразени со коронавирус на три локации во градот.
Најмалку 3.300 луѓе, главно во Ваџима и соседниот град Сузу, остануваат изолирани поради блокираните патишта.
Во повеќе од 80 училишта, вклучително и градовите Ваџима и Суза, наставата беше прекината поради оштетени згради.
Кабинетот на јапонскиот премиер Фуми Кишида денеска одобри буџетска распределба од 33
милиони долари од резервни фондови за поддршка на жртвите од земјотресот на полуостровот Ното.
Владата, исто така, планира да ги зголеми резервните средства предвидени во нацрт-буџетот за следната фискална година за финансирање на закрепнувањето од катастрофи, рече Кишида.
