Божиновска: Нов Закон за енергетика до крајот на месецот – поддршка за енергетски сиромашните и нови стандарди за обновливи извори
Министерката за енергетика, Сања Божиновска, во интервју за ТВ24 најави дека новиот Закон за енергетика е во финална фаза и ќе биде донесен до крајот на месецот. Законот е целосно усогласен со регулативите на Европската Унија и претставува клучен чекор кон праведна и одржлива енергетска транзиција.
Божиновска истакна дека околу 50.000 домаќинства во Македонија се наоѓаат во состојба на енергетска сиромаштија, што претставува сериозен социјален и енергетски предизвик. Новиот закон директно ќе се справува со овој проблем преку воведување на механизми за идентификација на сиромашните домаќинства и обезбедување на финансиска и нефинансиска поддршка, вклучително и мерки за спречување на исклучување од електрична енергија во зимскиот период.
„Со овој закон воведуваме системско решение за енергетската сиромаштија. За првпат, државата ќе има обврска да идентификува и активно да поддржува ранливи категории граѓани. Тоа не е социјална политика – тоа е прашање на енергетска правда,“ изјави Божиновска.
Таа потенцираше и дека досега не постои прецизна слика за реалната состојба на теренот, ниту пак методологија која овозможува системско следење на проблемот.
„Со новиот закон ќе воспоставиме и прецизна методологија – конечно ќе знаеме колку точно енергетски сиромашни домаќинства има, каква е состојбата на терен и каде се најголемите слабости. Сега работиме со приближни податоци. Кога ќе имаме целосна и јасна слика, ќе знаеме и какви мерки треба да се преземат,“ нагласи министерката.
Во процесот на креирање на новите енергетски политики, Министерството активно соработува со Енергетската заедница, со цел законодавството да биде во склад со европските стандарди, но и да одговара на домашните потреби и реалности.
Дополнително, Божиновска го најави и новиот Закон за обновливи извори на енергија, кој ќе вклучи нов стандард: сите нови енергетски објекти ќе мора да имаат минимум 20 проценти капацитет во батерии.
„Стабилноста на системот не може да се гради само на нови фотоволтаици – мора да вложуваме и во складирање. Со новиот закон за првпат ќе се воведе обврска дел од капацитетот да биде резервиран во батерии. Тоа ќе значи помалку преоптоварувања, поголема сигурност во снабдувањето и подобро искористување на обновливите извори,“ изјави Божиновска.
Со новите законски решенија државата ќе може точно да планира колку и кога може да има нови прикучоци на обновливи извори на енергија. Системите за складирање пак освен што ќе ја заштитат мрежата, ќе им овозможат на производителите да можат да ја сочуваат енергијата некое време и да ја продадат по подобра цена кога ќе е потребна, истакна Божиновска.
