Бочварски: Ангажманот на ЕРД Инженеринг за автопатите е најевтин

Според министерот за транспорт и врски Благој Бочварски, ангажманот на консултантот ЕРД Инженеринг, инаку конзорциум од три фирми спорни за јавноста, за надзор на автопатите на паневропските коридори 8 и 10д е најевтин во однос на цената на изградбата.

Според Бочварски, сумата од 22 милиони евра за надзор делува скапо, но тоа е затоа што услугата е за голема должина, односно за четири автопатски делници. Според министерот, претходните ангажмани на консултанти во Македонија и други земји од регионот биле поскапи.

Сумата од 22 милиони евра, како што рече тој во синоќешната емисија „Економски магазин“ на Алсат ТВ е многу мала во однос на 1,3 милијарди евра што ќе му бидат платени на конзорциумот Бехтел и Енка за шестгодишна изградба на автопатите.

„Тоа е најевтин надзор од сите други со кои сме направиле паралела. Кај нас е 1,69 отсто учеството на надзорот во вкупната сума за изградба. Нека се направи истражување на другите автопатишта колку чинат тие“, рече Бочварски.