Блокадата на евроинтеграциите добива карактер на сериозен безбедносен ризик, рече претседателката на денот на Армијата
На Централната свеченост по повод 18 Август – Денот на Армијата, претседателката и врховен командант на Армијата, Гордана Силјановска-Давкова, истакна дека денеска се одбележуваат 33 години од основањето на македонската Армија.
„Браник на македонскиот територијален интегритет и независност и важен мировен гарант“, нагласи Давкова.
Претседателката потенцираше дека блокадата на евроинтеграциите создава сериозен безбедносен ризик, како за регионот на Западен Балкан, така и за ЕУ.
„Природата на војната рапидно се менува, напредните технологии галопираат, незамисливи оружја парадираат, вештачката интелигенција се аплицира, а нуклеарната војна понекогаш како да се надвиснува над светот“, додаде таа.
Инаку, министерот за одбрана, Владо Мисајловски, истакна дека македонската Армија денеска слави „33 години напредок, 33 години безбедност на татковината и сигурност на граѓаните“.
Свеченоста се одржа со учество на припадници на Армијата и официјални лица, а програмата вклучуваше и парадни активности и презентација на способности на македонските војници.
