БИЗНИСМЕНОТ ФАТМИР ЕТЕМИ КУПИ УШТЕ 500 АКЦИИ НА КОМЕРЦИЈАЛНА – за нив плати околу 135 илјади евра
Продолжува трендот членови на раководните органи на Комерцијална банка да купуваат акции на нашата најголема банка, и најуспешна банка за минатата година, а која тукушто објави дека ќе дели дивиденда од 910 денари по акција на бруто износ за своите акционери.
Откако акции купија членовите на Управниот одбор и директори во банката, Илија Илоски и Билјана Максимовска, а неодамна дека купил акции банката објави и членот на Надзорниот одбор Горан Антевски, најновата информација е дека акции купил и членот на Надзорниот одбор, Фатмир Етеми, сопственик на градежната компанија ЗЗФ, кој и претходно има солидна количина акции во Комерцијална банка, а која сепак не надминува 5 проценти од вкупниот акционерски капитал на банката.
„Согласно Глава 6 од Правилата за котација, известуваме за следната ценовно чувствителна информација: Комерцијална банка АД Скопје известува дека г-н Фатмир Етеми, Член на Надзорниот одбор на Банката, се стекна со 500 обични акции издадени од Комерцијална банка АД Скопје“, се вели во известувањето од Комерцијална банка.
Ако се оди со претпоставката дека Етеми ги купил овие 500 акции по некоја просечна цена од околу 16.500 денари по акција, колку што во изминатиов период во просек се продаваа акциите на Комерцијална банка, значи дека за нив платил вкупна сума околу 135 илјади евра, иако е можѓно да е помалку или нешто повеќе.
Претходно акции купија Горан Антевски, Илија Илоски и Билјана Максимовска.
Н.Н.Ф.
