Астероид вечерва опасно блиску ќе се приближи до Земјата
Вечерва меѓу четврток (26.01) кон петок (27.01) новооткриен астероид опасно ќе се приближи до Земјата, јавува НАСА.
Експертите од американската вселенска агенција тврдат дека ова е најблискиот премин на небесно тело познат до денес.
Околу 2:30 часот по македонско време, астероидот би требало да дојде на 3.600 километри од Земјата. Само за споредба – Меѓународната вселенска станица се наоѓа на околу 400 километри над планетата.
Поминувањето на астероидот ќе се случи некаде на јужниот дел на Јужна Америка, а за жал љубителите на астрономијата во Македонија нема да можат да го набљудуваат овој феномен.
НАСА уверува дека нема опасност да удри во Земјата или во сателит. Астероидот е релативно мал по големина и ако се случи да се упати кон нашата планета, веројатно ќе се распадне и ќе изгори во атмосферата.
Само помали фрагменти би паднале на површината на Земјата – веројатно некаде во Аргентина, Чиле или Уругвај.
