Јанкуловска по ослободителната пресуда: Се надевам дека вистината за прислушкувањето ќе излезе на виделина
Поранешната министерка за внатрешни работи, Гордана Јанкуловска, изрази задоволство од денешната одлука на Основниот кривичен суд, кој ги уважи аргументите на нејзината одбрана во предметот „Тврдина“. Во својот јавен статус, Јанкуловска истакна дека, и покрај долгогодишните правни процеси, борбата за правда останува нејзин приоритет.
„Календарски помина речиси една деценија, а како да поминаа три животи на некој што доживеал длабока старост. Само семејството и релативно мал круг блиски луѓе и пријатели знаат како изгледаа овие години,“ напиша Јанкуловска, потенцирајќи ја тежината на овој период врз нејзиното семејство.
Таа посочи дека и покрај ослободителната пресуда, која е значаен чекор кон правдата, останува горчливиот факт дека во кривичната постапка не е утврден виновникот за масовното прислушување, кое, како што вели, длабоко го променило нејзиниот живот. „Се надевам дека, ако не во кривична постапка, тогаш во граѓанска постапка ќе се утврди кој го вршел прислушкувањето,“ додаде Јанкуловска.
Во предметот „Тврдина-Таргет“, кој опфаќаше масовно незаконско прислушување, многу од делата застареа по измените на Кривичниот законик минатата година. Одговорноста за уништување опрема за прислушување и фалсификување исправа остана предмет на судски процес. Во овој контекст, судот денеска донесе ослободителна пресуда за Јанкуловска, додека други поранешни функционери и разузнавачи добија затворски казни.
Случајот за масовното прислушување, кој го потресе општеството и предизвика сериозни последици, сè уште остава многу неодговорени прашања. Јанкуловска порача дека ќе продолжи со правната борба за да се утврди вистината и да се постигне правдата која, како што вели, ја заслужуваат не само нејзиното семејство, туку и целото општество.
