ЈАНЕЗ ЈАНША ВО ЖЕСТОК ДУЕЛ СО МАКЕДОНКАТА СТОЈМЕНОВА ДУХ Кој последен ќе се смее?
„Една голема шега“. Со оваа кратка, но остра оценка Емилија Стојменова Дух ја опиша актуелната политичка сцена во Словенија, отворајќи нов фронт во веќе заострените односи меѓу власта и опозицијата. Нејзината порака на „X“ веднаш предизвика реакција од лидерот на опозицијата Јанез Јанша, кој со ироничен тон ѝ возврати дека токму таа е дел од таа „шега“.
Кратката размена брзо прерасна во вирален политички дуел, со препознатливата реторика на Јанша насочена кон круговите блиски до премиерот Роберт Голоб. Иако формално станува збор за неколку реченици на социјалните мрежи, нивната тежина е далеку поголема – тие ја отсликуваат длабоката поларизација што ја тресе словенечката политика.
Ова не е прв судир меѓу двајцата. Во претходни настапи, Јанша знаеше да користи значително поостар речник кон Стојменова Дух, вклучително и контроверзни изјави поврзани со нејзиното потекло од Македонија.
– Не требаше да те примиме – изјави тогаш Јанша.
Токму затоа, и најновата преписка не се доживува како изолиран инцидент, туку како продолжение на подлабок конфликт. Во меѓувреме, додека вниманието е свртено кон социјалните мрежи, во парламентот се случува сериозен политички пресврт. За нов претседател на Собранието беше избран Зоран Стевановиќ, лидер на Resni.ca и жесток критичар на власта.
Со 48 гласа, неговиот избор претставува удар за владејачкото мнозинство и сигнал дека контролата врз институциите веќе не е сигурна. Иако партијата на Голоб има формална предност во бројот на мандати, новата распределба на силите покажува дека мнозинството е кревко и подложно на пресврти.
Помалите партии стануваат клучни играчи, а секоја политичка турбуленција – па дури и објава на „X“ – може да има реални последици врз стабилноста на власта. Емилија Стојменова Дух е словенечка политичарка и професорка со македонско потекло, која беше министерка за дигитална трансформација во владата на Роберт Голоб.
Родена во Македонија, кариерата ја изгради во Словенија, каде што се профилираше како експерт за дигитализација, иновации и нови технологии, со академско искуство и ангажман во повеќе меѓународни проекти. Во политиката влезе како дел од реформската агенда на владата, но често се наоѓаше во фокусот на јавноста – и поради своите ставови, и поради нападите од опозицијата, особено на тема идентитет и потекло.
.
