Андоновска: Бактерија пронајдена во носот на вработена од училиштето „Димо Хаџи Димов“
Директорката на Институтот за јавно здравје (ИЈЗ), Марија Андоновска, изјави дека сѐ уште е рано да се утврди точната причина за стомачните тегоби кај учениците од ООУ „Димо Хаџи Димов“ во Општина Карпош, бидејќи анализите и понатаму се во тек. Досегашните резултати покажуваат дека кај една вработена во носот е детектиран Staphylococcus aureus, а на три чешми во училиштето се најдени бактерии од групата Enterobacteriaceae, грам-негативни бактерии кои може да предизвикаат стомачни симптоми. Кај едно од децата е потврден норовирус.
До ИЈЗ досега пристигнале 29 пријави за симптоми, како и уште една наставничка. Во Детската клиника биле примени пет деца, а денеска се донесени уште две. Сите пациенти се во добра состојба и стабилни. Кај сестричка на едно од примeнетите деца веќе е потврден норовирус.
Андоновска соопшти дека постојат епидемиолошки индикации за итна дезинфекција на училиштето. Екипа на Центарот за јавно здравје ќе ја спроведе вонредната дезинфекција во најкраток рок.
Од девет земени брисеви од површини, три – сите од чешми – се позитивни на бактерии од групата Enterobacteriaceae. Од вработените во кујната, брисевите од раце и најголемиот дел од брисевите од нос и грло се во рамки на нормалните параметри, со исклучок на една вработена кај која е изолиран Staphylococcus aureus.
Водата од шест точки е микробиолошки задоволителна според првичните резултати, но се чека уште еден ден за конечна потврда. Физичко-хемиските анализи и проверката за тешки метали не покажале отстапувања.
По барање на Институтот, дополнително се земени примероци од децата хоспитализирани на Детската клиника. Кај едно од двете досега обработени фецесни тестирања е детектиран норовирус. Брисевите од грло и нос од пет деца се негативни на ковид и инфлуенца, а се чекаат резултати за други вируси.
Анализите на храната (млеко, мусли и кроасан) покажуваат дека овие производи ги исполнуваат микробиолошките стандарди. За мусаката, земена од кујната, резултатите се очекуваат до 16 часот.
Андоновска најави дека Институтот ќе иницира измени на законските и подзаконските акти за подобрување на хигиенските услови и безбедноста на храната во училиштата и градинките. Дополнително, земени се мостри од кујните на девет други училишта, но анализите продолжуваат.
Таа апелираше за зголемена хигиена, користење нови дезинфициенси и сапуни, а децата со симптоми да останат дома. Во случај на влошување, родителите најпрво да се јават кај матичниот лекар, а потоа и во Центарот за јавно здравје.
