Амбасадорката Агелер: „Македонија е земја што ја сакам и ја ценам, со огромен потенцијал за младите“
Американската амбасадорка во земјава, Анџела Агелер, во интервју за утринската програма „Македонија наутро“ на МРТВ, зборуваше за своето секојдневие, впечатоците за Македонија и нејзината работа како амбасадорка.
Агелер откри дека денот ѝ започнува многу рано, со прошетка на кучето, вежбање и преглед на вестите и електронската пошта, пред да пристигне во Амбасадата околу 8:30–9:00 часот.
„Утрото е многу важно за поставување на тонот за денот и за да бидеш подготвен за секој предизвик“, рече таа.
Опишувајќи како изгледа еден работен ден, амбасадорката посочи дека секојдневието ѝ е исполнето со состаноци и средби со институции, граѓани, студенти и политичари.
„Една од големите предности на тоа да се биде американски амбасадор е што соработуваме со македонската Влада и со граѓаните на теми како економијата, безбедносната и воената соработка, сигурноста и градењето на светла иднина“, истакна Агелер.
Таа потсети дека во Скопје работела и пред околу 12 години, во Одделот за односи со јавноста.
„Се заљубив во оваа земја, во луѓето, културното наследство, традициите, храната и виното. Чест и привилегија е да се биде амбасадор на САД токму овде“, додаде таа.
Говорејќи за македонското гостопримство, Агелер нагласи дека пријателствата во земјава се трајни.
„Кога ќе станете пријател со некого, станувате дел од семејството. Навистина е прекрасно што по враќањето овде имав пријатели кои ме прифатија како никогаш да не сум заминала“, изјави таа.
Меѓу анегдотите од престојот, амбасадорката ја спомена и македонската кујна, посебно пастрмајлијата.
„Не можам да изберам омилена, затоа што секој град смета дека неговата е најдобра. Сите се различни и вкусни“, рече Агелер со насмевка.
На прашањето за балансирањето на работните и приватните обврски, таа одговори дека „таен рецепт“ нема: „Клучот е да го сакате тоа што го правите и да работите напорно. Тоа важи и за мажите и за жените“.
Во завршните зборови од интервјуто, Агелер ја изрази својата приврзаност кон земјава: „Ова е земја што ја сакам и ја ценам. Тука има многу потенцијал, особено кај младите, и би сакала да го видам тој потенцијал остварен. САД секогаш ќе бидат тука, да работиме заедно со вас за тие цели“.
