Аферата „Провизиите кои чинат животи“, покажа дека за Филипче профитот бил на прво место, поставил модуларни болници од леснозапалив материјал
Аферата „Провизии кои чинат животи“ го разоткрива начинот на кој поранешниот министер за здравство, Венко Филипче, го водел ресорот во време на пандемија – со фокус на профитот и провизиите, наместо на здравјето на граѓаните.
Наместо да им даде приоритет на пациентите, Филипче, според новите информации, ставил акцент на тендерските зделки. Трагедијата во модуларната болница во Тетово, каде животот го загубија 14 лица, е најтрагичниот резултат од таквото работење.
Во време кога земјата се бореше со пандемијата, Министерството за здравство дозволило изградба на модуларни болници кои не ги исполнувале основните безбедносни стандарди – ниту според Законот за градење, ниту според Законот за здравствена дејност. Изведени се објекти со леснозапаливи материјали, без техничка заштита од пожари и експлозии.
Проектот за изградба на 16 модуларни болници, финансиран со 30 милиони евра од Светска банка, формално бил доверен на Министерството за труд и социјална политика поради сомнежи за капацитетите на МЗ. Но, техничките спецификации ги изработило лице од Министерството за здравство, именувано од Филипче. Подоцна било утврдено дека тие не одговараат на ниту еден здравствен стандард – се набавувале стоки, а не здравствени објекти.
Наместо да се подобрат условите по трагедијата, Владата преку Министерството за транспорт и врски итно го изменила Законот за градење, со цел модуларните болници да се класифицираат како урбана опрема. Со тоа, одобрението за нивно поставување го издавал самиот министер.
Објектите не се запишани во катастарот, немаат владини одлуки за трајно користење, ниту дозволи за употреба според прописите за простор, опрема и кадар.
Сите овие наоди се доставени до Јавното обвинителство за организиран криминал и корупција.
Лакомоста за провизии, според ВМРО-ДПМНЕ, чинела 14 човечки животи – луѓе кои во Тетово дошле по лек, а никогаш не се вратиле.
Центарот за комуникации на ВМРО-ДПМНЕ најавува дека наскоро ќе бидат објавени сите детали од аферата „Провизии кои чинат животи“, во која Венко Филипче е централна фигура.
