„Адинг“ го има рецептот! Какви адитиви додаде за да ја удвои добивката?
Уникатната македонска компанија за хемиски додатоци (читај адитиви н.з.) во градежништвото има одлично полугодие што е најава за солидна деловна година. За првите шест месеци компанијата произвела добивка од 634.000 евра што е 15% од приходот. А подобра вест е само тоа што добивката годинава е двојно поголема од профитот за истиот период лани
Реномираната македонска компанија за адитиви во градежништвото, скопски „Адинг“ има полугодие за пофалба. Добивката е удвоена во споредба со истиот период лани, приходите се зголемени за 13 отсто, извозот расте, а зголемена е и продажбата на домашниот пазар.
За првите шест месеци годинава „Адинг“ направи приход од продажба во вредност од 4,23 милиони евра. Извозот во вкупната продажба учествува во 1,8 милиони евра што е за 9 отсто подобро од истиот период лани. Каде се изведувале градежните адитиви на „Адинг“? Најмногу со Србија каде завршиле 55 отсто од целиот извоз. Од регионот тука се Бугарија со 19 отсто, Косово и Црна Гора со по 6 отсто, Бугарија со 19 отсто. „Адинг“ е толку баран што и во воени услови успеал во Украина да пласира речиси 4 отсто од целиот извоз. На домашниот пазар продажбата на „Адинг“ изнесува 2,4 милиони евра.
Оперативните расходи на компанијата изнесуваат 3,7 милиони евра. Очекувано убедливо најголема ставка се трошоците за суровини и материјали за кои „Адинг“ платил 2,33 милиони евра. Трошоците за вработените се втора по големина расходна ставка и тие изнесуваат 652.000 евра. Во споредба со истиот период лани се зголемени за 14 отсто.
Оперативната добивка на компанијата изнесува 639.000 евра што двојно повеќе од истиот период лани. Нето добивката е 634.000 евра и е поголема за 329.000 евра во однос на претходната година.
Од образложението кон резултатите е видливо дека компанијата правела идентичен профит во првите два квартали, што наведува на заклучок дека менаџментот добро ја планирал работата.
И во двата квартали од првото полугодие „Адинг“ ги натфрлал плановите за продукција и за продажба. Во првиот квартал планот е натфрлен за 27 отсто, а во вториот квартал за 20 отсто.
Р.Ф.
