60 деца хоспитализирани во Козле, пикот се очекува во јануари!
Во Клиниката за белодробни заболувања во Козле моментално се хоспитализирани 60 деца, од едномесечни бебиња до ученици. Станува збор за потешки респираторни инфекции кои не можат да се третираат дома, а за едно деноноќие се извршуваат до 150 прегледи. Засега нема потврден случај на грип.
Директорката на клиниката, проф. д-р Катерина Бошковска, апелира родителите најпрво да ги следат симптомите дома и да се обратат кај матичен лекар, а во случај на отежнато или забрзано дишење и интензивна кашлица – да побараат болничка помош. Најчести симптоми се потешко дишење, свирење во градите и висока температура, а дел од хоспитализираните пациенти имаат потреба од кислородна поддршка.
Институтот за јавно здравје засега не бележи пораст на случаи со симптоми слични на грипот. Лекарите очекуваат пикот во јануари.
