14-тиот роденден ФИНКИ го посвети на својот студент Спире Стоименов кој го загуби животот во пожарот во Кочани
Факултетот за информатички науки и компјутерско инженерство (ФИНКИ) денес ја одржа свечената промоција на дипломираните и магистрираните студенти за академската 2023/24 година, започнувајќи со едноминутно молчење во чест на жртвите од трагедијата во Кочани.
Настанот беше посветен на студентот Спире Стоименов, еден од 59-те загинати во пожарот, како и на четворицата повредени студенти – Ана Захариева, Анастасија Соколова, Јорданчо Ефтимов и Петар Стојменовски, кои сè уште се лекуваат.
– Нашиот драг колега Спире беше активен учесник во организацијата на претходните свечености за Денот на факултетот и пример за студент кој посветено придонесуваше за развојот и промоцијата на ФИНКИ. Оваа церемонија ја посветуваме на него – беше истакнато на отворањето на настанот.
Министерката за образование и наука, Весна Јаневска, им порача на дипломираните да продолжат да се усовршуваат, но и да останат во земјава и да помогнат во нејзиниот развој.
– Вашата професија е барана и важна за иднината. Се надевам дека ќе одлучите да работите овде, каде што сте најпотребни – нагласи Јаневска, најавувајќи реформи во високото образование, вклучително и можност за гарантирано вработување на најдобрите студенти во јавните универзитети и научни институции.
Таа потврди дека ФИНКИ конечно ќе добие нов објект.
– Процедурата е во тек, и во рамки на овој владин мандат, зградата ќе биде завршена. Нашата цел е младите да добијат квалитетно образование и добри можности за работа во Македонија – истакна министерката, изразувајќи сочувство за загинатиот студент и желби за брзо закрепнување на повредените.
Деканот на ФИНКИ, Боро Јакимовски, информираше дека во минатата година дипломирале над 430 студенти, што претставува зголемување од 20%, а 20 студенти успешно магистрирале.
– Покрај квалитетно образование, ФИНКИ активно соработува со индустријата, обезбедувајќи практични знаења препознаени од компаниите. Продолжуваме со подготовка на идните инженери, поддржувајќи ја дигиталната трансформација на државата – истакна Јакимовски.
Тој изрази надеж дека наскоро ќе бидат завршени зградите за ФИНКИ, со што конечно ќе се реши долгогодишниот просторен проблем на факултетот.
