РОДИТЕЛИ НЕ ГИ ПУШТИЈА ДЕЦАТА НА НАСТАВА Во ОУ „Димо Хаџи Димов“ уште владее стравот од труење
Голем број родители на ученици од основното училиште „Димо Хаџи Димов“, денеска одлучија да не ги пуштат своите деца на настава и испорачаа пет барања до директорката и советот на родители. Повеќе од 70 родители побараа училиштето да обезбеди строга контрола на храната и јасен протокол за хигиена во сите простории, објави Телма.
– Бараме јасен план кој ќе обезбеди редовен и засилен санитарен надзор, строга контрола врз операторот кој ја подготвува храната, протокол за хигиена на простории и конкретни чекори за спречување на сличен инцидент. Доколку тоа не се исполни ќе бидат вклучени општината, МОН, и другите надлежни институции – порачаа родители на ученици во ООУ „Димо Хаџи Димов”.
На Детската клиника велат дека се прават последните испитувања за четирите деца кои се хоспитализирани, нивната состојба е стабилна и наскоро ќе бидат пуштени дома.
Откако голем број ученици во ОУ „Димо Хаџи Димов“ се пожалија на стомачни болки, а 13 од нив беа хоспитализирани, надлежните инспекции зедоа примероци за анализа. Резултатите покажаа дека во мусаката која ја јаделе децата во училиштето имало фекални бактерии тнр ентеробактерии, а исто така и во водата од три чешми во училиштето. Брис од нос на една од вработените во кујната покажал дека таа имала бактерија стрептокока, а 6 од 7 хоспитализирани деца имале норовирус.
ШЕСТ ОД ДЕЦАТА ОД „ДИМО ХАЏИ ДИМОВ“ ПОЗИТИВНИ НА СТОМАЧЕН ВИРУС Водата во училиштето е безбедна
.
