МВР набави возила со вграден радар: Нови „Форд“ возила ќе мерат брзина и во движење
Министерството за внатрешни работи ги прими новите специјализирани возила за мобилно мерење на брзината – современи „Форд“ модели опремени со интегрирани радарски системи, камери со висока резолуција и софтвер за моментално лоцирање и документирање на прекршоци.
Возилата ќе патролираат низ целата држава и ќе детектираат пречекорување на дозволената брзина во градски средини, на регионални патишта и на автопат. Од МВР засега не откриваат кога системот ќе биде ставен во редовна употреба, но неофицијално се очекува да стане дел од нови мерки за зголемена сообраќајна безбедност.
Не е познато дали прекршителите ќе бидат запирани на лице место или казните ќе им се доставуваат по пошта, како со постојниот „Safe City“ систем. Мобилните радари од овој тип веќе се користат во повеќе европски земји и се покажуваат како ефикасни во намалување на сообраќајните прекршоци.
Во Германија функционираат радарски комбиња што мерат брзина без присуство на службеник, додека Франција користи патролни „Рено“ и „Пежо“ возила со невидливи радари кои детектираат и во движење. Сличен модел применуваат и Словенија и Хрватска.
По низа трагични сообраќајни несреќи поврзани со екстремно брзо возење, очекувањата се дека новите мобилни радари ќе ја зајакнат контролата и дисциплината кај возачите.
